𝐖𝐚𝐫𝐚𝐚𝐧𝐚𝐚 𝐟𝐢 𝐇𝐚𝐥𝐞𝐞𝐥𝐥𝐚𝐚 𝐎𝐫𝐨𝐦𝐢𝐲𝐚𝐚 𝐊𝐞𝐞𝐬𝐬𝐬𝐚𝐭𝐭𝐢 𝐇𝐢𝐝𝐝𝐚 𝐆𝐚𝐝-𝐉𝐚𝐛𝐞𝐞𝐟𝐟𝐚𝐜𝐡𝐚𝐚 𝐉𝐢𝐫𝐮 𝐈𝐥𝐚𝐚𝐥𝐜𝐡𝐢𝐬𝐞𝐞 𝐈𝐛𝐬𝐚 𝐀𝐝𝐝𝐚 𝐁𝐢𝐥𝐢𝐬𝐮𝐦𝐦𝐚𝐚 𝐎𝐫𝐨𝐦𝐨𝐨

𝐖𝐚𝐫𝐚𝐚𝐧𝐚𝐚 𝐟𝐢 𝐇𝐚𝐥𝐞𝐞𝐥𝐥𝐚𝐚 𝐎𝐫𝐨𝐦𝐢𝐲𝐚𝐚 𝐊𝐞𝐞𝐬𝐬𝐬𝐚𝐭𝐭𝐢 𝐇𝐢𝐝𝐝𝐚 𝐆𝐚𝐝-𝐉𝐚𝐛𝐞𝐞𝐟𝐟𝐚𝐜𝐡𝐚𝐚 𝐉𝐢𝐫𝐮 𝐈𝐥𝐚𝐚𝐥𝐜𝐡𝐢𝐬𝐞𝐞 𝐈𝐛𝐬𝐚 𝐀𝐝𝐝𝐚 𝐁𝐢𝐥𝐢𝐬𝐮𝐦𝐦𝐚𝐚 𝐎𝐫𝐨𝐦𝐨𝐨

𝐀𝐝𝐨𝐨𝐥𝐞𝐬𝐬𝐚 𝟐, 𝟐𝟎𝟐𝟐

Walitti bu’insaa fi wal-waraansi gaanfa Afirikaa tibbana sadarkaa yaaddessaa irra ga’ee jira. Naannicha keessatti bakka tokkotti rakkoon yoo dhalate iddoo biraattis rakkoo uumuudhaan wal harkisee babal’achaa deema. ABOn dhimmi kun of eeggannoo fi hubannaadhaan qabamuu qaba jedhee amana. Haatahu malee gaggeessitoonni Paartii Bilxiginnaa adeemsa maal na dhibdee deemaa jiru. Dararami, duuti, buqqaafamuu fi beellii uummataa bartee jireenya guyyaa guyyaa uummatichaa ta’ee jira. Dogoggorama baroota darban raawwatamaniif qaamni yaade ammallee hin jiru.

Tibbana pirezidantonni Mootummaa Naannoo Amaaraa fi Mootummaa Naannoo Oromiyaa Baahirdaaritti walga’anii mari’achuudhaan ‘Riphe loltoota” Oromiyaa keessa jiraatan kan isaan “Oneg Shanee” jedhanii waaman irratti waraana labsanii jiru. Kanumaan Loltoonni Raayyaa Ittisa Biyyaa meeshaalee gurguddoo hidhatan Naannoo Amaaraa irraa kallattii garaagaraan Oromiyaa seenaa jiru.

Rakkoo maddi isaa siyaasa ta’eef deebii akkanaa marsaalee hedduu deddeebi’anii yoo kennan yooimyyuu fala hin taane. Tarkaanfii akkanaa marsaa marsaadhaan deddeebi’ee fudhatamaa tureen uummata nagaa, daa’’imman, dargaggoota, namoota raagan fi dubartootatu ajjeeffama, mana namoota nagaatu gubama, midhaan oyiruu fi gumbii keessatti mancaafama, namootatu qe’ee fi qabeenya isaanii irraa buqqaafama. Yeroo kanatti Itoophiyaan baay’ina namoota biyya isaanii keessatti qe’eef qabeenya isaaniirraa buqqaafamaniin sadarkaa jalqabaa irratti argamti. Namoonni kumootaan lakkaa’aman beela’anii jiru. Ongeenis hammaachaa jira. Rakkoolee kanneen humna waraanaan furuuf yaaluu bu’aa tokkollee hin qabaanne waggoota 50 darban arginee jirra. Keessumaa ammo yeroo ammaa kana humna waraanaatiin rakkoo siyaasaa biyyattii furuuf yaaluun balaa baay’ee hamaa ta’e qabatee dhufa.

Waan kana ta’eef pirezidaantonni naannolee lamaanuu tarkaanfii lola labsuu kanarraa of qusatanii, marii fi karaa nagaatiin rakkoo jiru furuuf akka hojjetan waamicha goona. Kana ta’uu baannaan dhiigga dhangala’uuf deemuu fi rakkoo inumaa uummata gidduutti hammaachuuf jiruu, dararamaa fi buqqaafamuu uummata nagaa kanaan walqabatee dhufuuf gaggeesitoota kanneentu itti gaafatama.

Naannooleen Itoophiyaa biroon dantaa waliinii, obbolummaa, hariiroo fi nagaan waliin jiraachuun uummata sabaaf sablammoota biyyattii gidduu jiru akka hin boorofneef gocha kana keessatti akka hin hirmaanne hubachiifna.

Injifannoo Uummata Bal’aaf!
Adda Bilisummaa Oromoo
Adoolessa 2, 2022
Finfinnee, Oromiyaa