Magaalaa Finfinnee keessatti guyyaa Hagayya 27/2025 irraa eegaluun guutummaa magaalittii keessatti waardiyyoota mana bank dabalatee gamoo dhuunfaafi dhaabbilee garaagaraa eegan hunda humnaan akka walitti qaban dirqamni itti kennamuun poolisoonni bakka namoonni eegumsarra jiratti humnaan deemuun qabanii walga’ii seensuun dirqamoota hin barbaachifne itti kennaa jiru.
Akka fakkeenyaatti dirqamni isaan labsan waardiyyaan dhaabbata kamiituu qaxanaalee jiru keessatti tokko shaniin ijaaramee poolisii Aanaafi qaxanaa hoogganu waliin akka hojjetuufi yoo fedha hin qabaanne akka tarkaanfiin irratti fudhatamu.
Waardiyyaan kamuu bakka hojiirra jiru hundatti eegumsa silaa eegaa jiru cinaatti halkanis guyyaas naannoo jiru akka eeguufi namoota naannoo inni jiru kamuu fuulasaa ilaalee nama haaraa ykn rakkoo uumuu danda’a jedhee kan shakku taanaan ariitiidhaan poolisii qaxanaa sanaatti bilbilee akka qabsiisu.
Amma baatii fulbaanaa 2018 kana keessa eebba Hidha Abbaay dabalatee walxajjiiwwan Addunyaa gurguddaan Finfinnee keessatti waan deemsifamuuf wwardiyyoonni hotelaa nama kamuu akka hin amanneefi dhalaas ta’e dhiira akka waraqaa eenyummaa utuu hin fuudhiin hin bulchineefi lammiilee biyya Alaas yoo ta’an keemikaala balaa geessisu qabatanii dhufuun mana siree tursuun balaa uumuu waan danda’aniif addatti akka sakattaataniifi nama shakkitan kamuu qabfiiftanii akka qorachiiftan jechuun dirqama biraa labsaa jiru.
Kana malees wardiyyaan poolisii waliin ijaaramee nageenya hin eegsisu ykn odeeffannoo dabalatee waan poolisiin barbaadu kamuu hin godhu jedhe ofiisaatuu rakkoo waan qabuuf akka tarkaanfiin irratti fudhatamu jechuun waardiyoota addaa addaa magaalaa Finfinnee keessaa hojii rakkisaafi ulfaataa kana agabuu bulanii hojjechaa jiran dararaa jiru.
Lammiileen biyya halaafaa biyya kanatti fanjii hidhanii balaa uumuuf akka yaada qaban odeessa qabna.
Gareewwan biyya kana keessaa faallaa mootummaa ta’an waliin wal ijaaruun biyyoonni ollaa keenyaa dhimmoota addaa addaaf nuun falmaa jiran konkolaataatti boombii hidhuu.
Bakkoota addaa addaatti fanjii awwaaluufi keemikaalota dhangalaa’aafi daakuu ta’anii garuu balaa guddaa geessisan Finfinnee seensuun walxajjiiwwan gurguddaa Addunyaaf Finfinneetti qopheessuuf jirturratti namoota walxajjiif alarraa dhufan miidhanii maqaa biyya keenyaa balleessuuf hojjechaa akka jiran quba waan qabnuuf nama hunda hirmaachisuun adeemsa kana fashalsuuf hojiitti seenneerra jedhu.
