Murtee Ejjennoo fi Kutannoole Kora Gamtaa ABO Ameriika Kaaba kan bara 2024
Korri Miseensota ABO U.S.A fi Canada kan bara 2024 Magaalaa Minneapolis, Minnesota tti Adoolessa 31 hanga Hagayya 2, 2024 tti geessame. Korri kun haala baroota ja’an darban keessa nu mudateen daddaaqaminsa hedduu keessa darbamee as gahame keessatti taasifamuun kan bara 2024 kun afuura haara fi jeequmsa baroota darbanii irra aanuun dandamannaa gaarii bifa callaqiseen ta’utu mirkanaa’e.
Bifuma kanaan nuti miseensotni ABO kora kana irratti hirmaanne dhimmoota ijoo dubbi Jaarmiyaa keenyaa irratti mari’atuuf gamaaggamuun, haala siyaasaa PP fi waligala adeemsa siyaasa biyyichaas tilmaama keessa galchuun QBO ABOn durfamu bakkan ga’uun galii keenya isa bu’uura ta’u hubannee murtii ejjennoo fi kutannoolee asiin gadii dabarsine.
1. Addi Bilisummaa Oromo (ABOn) Jaarmiyaa akeekaa fi kaayyoo Ummata Oromoo Waggoota 50 oliif utuu hin sharafiin baate as gahuun kallachummaa isaa mirkaneesse waan ta’eef bakka amma geenyee jirru irraas Kaayyo kana kan galmaan ga’u ABO ta’uun irra deebin mirkana waan ta’eef hanga xumuratti Jaarmiya keenya jalatti hiriirree murannoon itti fufuuf waada keenya haaromsine.
2. Afaan-faajji keessa fi alaan olola moora qabsoo bilisumma Oromoo (QBO) irratti oofama jiruu fi keessumma ammoo olola dharaa ABO irratti xiyyeeffate maseensuuf Sabni Oromoo bilchiinan haala jiru hordofee akka qalbiin ilaalu waamicha gochaa haleellaa bifa Olola, hidhaa fi hiraarsaa Hooggana, Miseensa, fi Deggeraa ABO irratti xiyyeffate hunda bifa feesiseen dura dhaabbachuun kutanno keenya ta’u addeessine.
3. Qabsaa’otni fi Sabboontonni Oromoo kanneen bifa dhuunfaan, garee fi akkasumas bifa Jaarmiyaan QBO keessatti hirmaataa jirtan hundi waa’illan ABOti jenne waan amannuuf qabsoo isin gama keessaniin gootan dinqisiifacha olola farreen QBO afarsaniif gurra kennuu dhiisuun yoo dandeenye qabsoo waliin qindeeffachuu, yoo dadhabne wal kabajnee toora hiriirree irratti xiyyeeffachuun qabsoo saba keenya akka finiinsinuuf waamicha keenya dabarsina.
4. Kaayyoo Diina isa “addaan qoodun bitu ykn Divide and Rule” jedhu bu’ura godhachuun daddaqaminsa fi rakko Motummaan Itophiya moora QBO keessatti facasee dhugoomfachuun kanneen maqa Jaarmiya ganamaa maqaa aqaaqani ittin socho’an gochaa kanarra akka dhaabbatan akeekkachiisaa ABOn Jaarmiya Kaayyo isa hundee kan maqaa fi akeekni isaas hin sharafamne ta’u irra deebine hubachiisna.
5. Humnootni addaa addaa kanneen maqaa ABOtti duraa fi duubaan (pre-fix or suffix) maxxanfatani socho’ani kan “Adda Bilisumma Oromoo ykn ABO” isa bu’uura bakka hin buune ta’u mirkaneessaa Ummatni Oromoo fi kannen dhimmi ilaallatu hundi hubanna ifa ta’e akka argatan gad jabeessinee dhaammanna.
6. ABO daran jabeessuuf deggersa bifa hundaan barbaachisu dachaan gumaachuuf murteessine.
7. Dhiibbaa mootummaan Itophiyaa ABO irraan geessisa jiru balaaleffachaa Hogganootni ABO badi tokko malee hidhaatti dararamaa jiraniifi hidhamtootni siyaasaa waligalaa hal duree tokko malee hatattamaan akka gad lakkifaman gad jabeessinee gaafatna.
8. Ummatni Oromoo burjaajii baroota darban keessaa fi alaan oofama ture qalbiin ilaaluun daandi tokkicha bilisumma Oromoof falmu, daandii ABO jala akka hiriiru waamicha goona.
9. Nagaa waara Oromia fi Itophia keessatti buusuuf waaranni Motuummaa PP hatattaman Ummata keessaa akka ba’uu fi ajjeechaa namoota nagaa irratti raawwatu akka dhaabu akeekkachisna.
10. Hojii Qabsoo bifa adda addaan geeggessamu deggeruun dirqama keenya ta’uu hubannee qabeenya barbaachisu hunda dhiheessuuf waada galle.
11. Sarbamnsi mirga namoomaa mootummaan Itophiyatiin Ummata Oromoo fi Ummatoota biraa irratti raawwataa jiru balaaleffachaa aanga’ooti mootummichaa yakka kana raawwatan akka seeran gaafataman hubachiisna.
12. Milkaa’insa Qabsoo Bilisumma Oromootiif tattaaffiin karaa Siyaasaa, Waraanaa fi Diplomasi taasifama jiru waan wal utubuu fi waliif tumsu ta’u hubannee tokkummaa qabsaa’oota itichuuf qabsaa’ootni Oromoo wal hubannoon akka tarkaanfatan waamicha goona.
13. Yakka mootummaan Itophia Oromoo irratti raawwataa jiruu fi waraana Oromia irratti labsamee biyya keenya hogdi lolaa godhee jiru hatattamaan dhaabsisuuf dhiibbaan humnoota Adunnyaa murteessaa waan ta’eef, qaamotni dhimmi kun ilaallatu dhumaatii Oromiya fi biyyicha keessatti akka waligalaatti deemsisama jiru akka dhaabsisaniif Hawaas adunyaatiif dhaamsa hatattamaa dabarsina.
Kora Gamtaa ABO Amerika Kaabaa
Hagayya 2, 2024
Minneapolis, Minnesota
