𝐀𝐝𝐝𝐢 𝐁𝐢𝐥𝐢𝐬𝐮𝐦𝐦𝐚𝐚 𝐎𝐫𝐨𝐦𝐨𝐨 𝐌𝐚𝐚𝐥 𝐍𝐚 𝐃𝐡𝐢𝐛𝐞𝐞 𝐅𝐢 𝐇𝐚𝐚𝐥𝐚 𝐆𝐚𝐚𝐟𝐚𝐭𝐚𝐦𝐧𝐢 𝐈𝐭𝐭𝐢 𝐇𝐢𝐧 𝐃𝐡𝐚𝐠𝐚’𝐚𝐦𝐧𝐞𝐞𝐧 𝐘𝐚𝐤𝐤𝐚 𝐔𝐦𝐦𝐚𝐭𝐚 𝐒𝐢𝐯𝐢𝐢𝐥𝐢𝐢 𝐈𝐫𝐫𝐚𝐭𝐭𝐢 𝐑𝐚𝐚𝐰𝐰𝐚𝐭𝐚𝐦𝐚𝐚 𝐉𝐢𝐫𝐮 𝐀𝐦𝐦𝐚𝐬 𝐉𝐚𝐛𝐞𝐞𝐬𝐬𝐞𝐞 𝐁𝐚𝐥𝐚𝐚𝐥𝐞𝐟𝐟𝐚𝐭𝐚

𝐀𝐝𝐝𝐢 𝐁𝐢𝐥𝐢𝐬𝐮𝐦𝐦𝐚𝐚 𝐎𝐫𝐨𝐦𝐨𝐨 𝐌𝐚𝐚𝐥 𝐍𝐚 𝐃𝐡𝐢𝐛𝐞𝐞 𝐅𝐢 𝐇𝐚𝐚𝐥𝐚 𝐆𝐚𝐚𝐟𝐚𝐭𝐚𝐦𝐧𝐢 𝐈𝐭𝐭𝐢 𝐇𝐢𝐧 𝐃𝐡𝐚𝐠𝐚’𝐚𝐦𝐧𝐞𝐞𝐧 𝐘𝐚𝐤𝐤𝐚 𝐔𝐦𝐦𝐚𝐭𝐚 𝐒𝐢𝐯𝐢𝐢𝐥𝐢𝐢 𝐈𝐫𝐫𝐚𝐭𝐭𝐢 𝐑𝐚𝐚𝐰𝐰𝐚𝐭𝐚𝐦𝐚𝐚 𝐉𝐢𝐫𝐮 𝐀𝐦𝐦𝐚𝐬 𝐉𝐚𝐛𝐞𝐞𝐬𝐬𝐞𝐞 𝐁𝐚𝐥𝐚𝐚𝐥𝐞𝐟𝐟𝐚𝐭𝐚

Ijoo Dubbii ABO – Mudde 03,2022

Mootummaan Paartii Biltsiginnaa ummata nagaa irratti Boombii roobsuu fi humna lafoon dhumaatii suukanneessaa dhaqqabsiisuu itti fufeera. Walakkeessa ji’a Onkoloolessaa irraa jalqabee hanga har’aatti duula WBO dhabamsiisuu jedhuun goleelee Oromiyaa adda addaa keessatti haleellaa xayyaaraa fudhataa jiruun lammiilee nagaa dhibboota hedduu galaafatee jira.
Har’as ummatni siviiliin dafqee jiraatu, hojii isaa malee hidhatnoo waraanaa hin qabne, manaa fi ooyiruu isaa keessatti, bakka waaqeffannaatti, iddoo walgahiitti, manneen barnootaa fi kkf keessatti boombii samii irraan roobsamuun dhibbootaan dhumataa jira.
Mudde 02,2022 guyyaa kaleessaas Giddu-galeessa Oromiyaa, Godina Kaaba Shaggar Salaale, Onoota Warra Jaarsoo fi Kuyyuu keessatti xayyaarotni waraanaa sirna mootummaa Biltsiginnaa WBO rukutuu kan jedhuun irra deddeebiidhaan qe’ee ummataa keessatti haleellaa raawwataniin ummatni siviiliin dhibbootaan lakka’amu ajjeesamuu fi hedduun madaa’uu odeessi qabatamaan ummata keessaa argame ni ifoomsa.
Ona Warra Jaarsoo magaala xiqqoo baadiyaa keessatti argamtu Faajjii Ejersaa jedhamtu irratti haleellaan xiyyaaraa raawwatame lammiilee nagaa hedduu galaafate. Akka odeessa kanaatti yo xiqqaate namootni 80 ol ta’an du’aniiru; baay’een madaa’aniiru. Maatii tokko keessaa namootni 6 walfaana akka dhumatanis dhaga’ameera.
Kanneen boombii xayyaara mootummaa Biltsiginnaan dhumatan kunniin ummata nagaa hojjetatuuf manaa ba’e, qonnaan bultoota, barattoota mana barumsaa galaa turanii fi kanneen mana boo’ichaa deemaa turan akka ta’an beekuun danda’ameera. Haleellaa kanaan kanneen madaa’anii qaamaa hir’atanis lakkoobsaan baay’ee dha.
Haleellaan xayyaaraa Ona Kuyyuu irratti rawwwatames bal’aa, namootni baay’een dhumatuu fi madaa’uu odeessi ummataa ni hubachiisa. Xayyaarotni waraanaa (MIG) mootummaa Biltsiginnaa yeroo 4f Kuyyuu araddoota Uyyee Cabaree fi Qarree Taa’aa irratti boombii roobsan. Bal’inni haleellaa raawwatamee kun ganda tokko guutuutti barbadeessuu akka ta’e ogeeyyotni ni hubachiisu.
Miidhaan dhaqqabe hin beekamin malee, Mudde 01,2022ttis Lixa Oromiyaa, Godina Horroo Guduruu Wallaggaa, Guduruu Gabatee irrattis mootummaan Biltsiginnaa haleellaa samii irraan raawwatuu jiraattotni ifa godhaniiru. Miidhaa qaqqabe hubatuuf sararri cufaa waan taheef hubatuun rakkisaa tahus suukanneessaa fi hedduu akka tahe himama.
Haleellaa xayyaaraan alattis mootummaan paartii Biltsiginnaa, Godinoota Wallagga Bahaa fi Horroo Guduruu Wallaggaa keessatti nagaa fi qabbanni bu’ee ummatni nagaan hojjetatee akka hin jiraanne gochuun, lammiileen Oromoo guyyuu jumlaan akka ajjeesaman, kumootaan qe’ee ofii irraa akka buqqa’an, qabeenyii fi manneen ummataa akka barbadaawu gochuu itti fufeera.
Murni goolessituu Faannoo, miliishaan/humni addaa naannoo Amaaraa fi waraanni ittisa biyyaa malootaa fi tooftaalee garagaraan qindoomina waloo tolfataniin Baha Wallaggaa fi Horroo Guduruu Wallaggaa keessatti ummata Oromoo irratti yakka waraanaa raawwatuu itti fufanii jiran. Isa fagoo dhiisnee ajjechaan jumlaa Sadaasa 29,2022 Kiiramuutti ta’e kanaaf ragaa guddaa dha.
Walumaagalatti golgaa WBO bal’eessuu jedhuun mootummaan federaalaa paartii Biltsiginnaan durfamu ummata nagaa qe’ee isaa keessatti xayyaara lolaa fi waraana humna lafoon fixaa jiru, ABOn akkuma arma duraa ammas gocha kana jabeessee balaaleffat; ummatas hubachiisa.
Mootummaan kun karaan qabatee jiru kan yaakkaa, dhiigi ummata nan bulcha jedhuu akka bishaanii gadi naqaa jiru kun kan isa gaafachiisu ta’uu hubachiisa. Rakkoo siyaasaa humna waraanaan furuuf yaaluun, ummata nagaa boombiin haleeluun muddama jiru daran yoo hammeesse malee furmaata fidu kan hin qabne ta’uun har’as ejjennaa ABO ti.Addi Bilisummaa Oromoo (ABO)n dhuma irratti, mootummaan Biltsiginnaa ummata nagaa irratti boombii roobsuu fi waraanaan dhumaatii jumlaa lammiilee Oromiyaa irratti raawwatu akka dhaabu gadi jabeessee hubachiisaa, hawaasni addunyaa, kanneen mirga dhala namaaf falmanii fi naga jaal’attootni hundi mootummaan kun duguuggaa sanyii raawwataa jiru akka dhaabuuf dhiibbaa gama isaanii akka godhan irra deddeebiin gaafata.
Injifannoo Ummata Bal’aaf!
Adda Bilisummaa Oromoo
Mudde 03,2022
Finfinnee