𝐌𝐮𝐫𝐧𝐚𝐚 𝐟𝐢 𝐆𝐚𝐫𝐞𝐞𝐧 𝐅𝐢𝐱𝐢𝐧𝐬𝐢 𝐋𝐚𝐦𝐦𝐢𝐢𝐥𝐞𝐞 𝐎𝐫𝐨𝐦𝐢𝐲𝐚𝐚 𝐈𝐫𝐫𝐚𝐭𝐭𝐢 𝐀𝐤𝐤𝐚 𝐑𝐚𝐰𝐰𝐚𝐭𝐚𝐦𝐮𝐮𝐟 𝐖𝐚𝐚𝐦𝐢𝐜𝐡𝐚 𝐆𝐨𝐝𝐡𝐚𝐧 𝐈𝐭𝐭𝐢 𝐆𝐚𝐚𝐟𝐚𝐭𝐚𝐦𝐨𝐨 𝐝𝐡𝐚.

𝐌𝐮𝐫𝐧𝐚𝐚 𝐟𝐢 𝐆𝐚𝐫𝐞𝐞𝐧 𝐅𝐢𝐱𝐢𝐧𝐬𝐢 𝐋𝐚𝐦𝐦𝐢𝐢𝐥𝐞𝐞 𝐎𝐫𝐨𝐦𝐢𝐲𝐚𝐚 𝐈𝐫𝐫𝐚𝐭𝐭𝐢 𝐀𝐤𝐤𝐚 𝐑𝐚𝐰𝐰𝐚𝐭𝐚𝐦𝐮𝐮𝐟 𝐖𝐚𝐚𝐦𝐢𝐜𝐡𝐚 𝐆𝐨𝐝𝐡𝐚𝐧 𝐈𝐭𝐭𝐢 𝐆𝐚𝐚𝐟𝐚𝐭𝐚𝐦𝐨𝐨 𝐝𝐡𝐚.
Ijoo Dubbii ABO – Sadaasa 26,2022
Waamicha lolaa itti fufuu fi fixiinsa lammiileef maqaa “ qurxummii bal’eessuuf galaana gogsuu” jedhuun qondaalli PP Obbo Fiqaaduu Tasammaa godhe, Waxabajjii 28/2022 “Maqaa humna riphee lolaa waloon dhabamsiisuu” jedhuun piresidaantiin naannoo Oromiyaa Obbo Shimallis Abdiisaa fi Piresidaantiin naannoo Amaaraa Dr. Yiliqaal Kaffaalee karaa sabaa himaaleen gadi bahuun waamicha duguggaa sanyii labsan. Kunis qindeessummaa mootummaa Partii Biltsiginnaan lubbuun lammiilee nagaa kumootaan darbee, qe’ee fi qabeenyi mancaa’ee, kuma dhibbootaan kan lakkaawaman qe’ee ofii irraa buqqaafamanii jiru.
Hawwii barootaaf ummata Oromoo cabsuu fi mooraa qabsoo bilisummaa Oromoo xiqqeessuu jedhu tarsiimoo godhatanii kanneen socha’an waamicha duguuggaa sanyii lammiilee Oromiyaa irratti raawwataniif, qaama duguuggaa kana rawwataa jiru waliin itti gaafatamummaa fudhatuu qabu.
Gola mootummaa abbaa irree PP maadheffatuun, aangoo waahilummaa PP kan argate, fedhii ummata Oromoo dura dhaabbatuuf barootaaf kan hojjetaa ture, “qabsoo Oromootu na sodaachisnaanan Qabsoo seene” kan jedhu hogganni jaarmiyaa siyaasaa EZEMA Prof. Birhaanu Naggaa fi hordoftootni isaa waamicha duguuggaa sanyii maqaa “shanee bal’eessuu” jedhuun, lammiilee Oromiyaa irratti karaa sabaa himaalee fi waltajjii ummataa adda addaa irratti godhaa jiraachuun ifatti mul’ata. Hogganni maqaa jaarmayaa siyaasaan sossohuu fi Oromoo diinomsatuun faallaa Oromoo hojjetu kun gocha isaa kana irraa akka dhabbatu gaafanna.
Armaan dura yaaddoo qabsoo fi qabsaawaa Oromoo irraa qabu karaa barruu adda addaa waggootaaf barreessaa fi maqa-bal’eessii adda addaa rawwaata turuun ni yaadatamaa.
Aangoo har’a argatan kanaaf karra kan bane qabsoo Oromoo ta’uun dagatamuu hin qabu. Ummatni Oromoo fedhii fi hawwii isaa kan ta’e Bilisummaa fi Walabummaa biyya isaa argachuuf barootaaf qabsootti jira. Qeerroon Bilisummaa Oromoo fi waliigalatti ummatni Oromoo guutuu Oromiyaa keessatti dhiiga isaa dhangalaasee mootummaa abbaa irree wayyaanee/EPRDF karaa irraa maqsus, injifannoon Qeerroo waan butameef, Qeerroonis ummatni Oromoos qabsoo bilisummaa itti fufan.
Ummatni Oromoo qabsoo isaa itti fufuun hiree ummatoota kaanii ukkaamsuuf akka hin taane qabsoo isaa waggaata dheeraan mirkaneessee jira lafa irratti. Kaleessas har’as fedhii hiree ofii ofiin murteeffachuuf qabuu fi walabummaa isaa mirkaneessuuf qabsoo itti fufe malee, akka jal’ootni itti qabsoo bilisummaa Oromoo ibsaa jiran akka hin taane Addi Bilisummaa Oromoo gadi jabeessuun hubachisa.
Dhuma irratti mootummaa Biltsiginnaas ta’e, jaarmiyaan namoota dhuunfaan duguuggaa sanyii Oromiyaa keessatti rawwatamaa jiruuf waamicha dabalataa godhan akka seeraa biyya fi idil-aduunyaatti dhumaatii waggoota darban kana rawwatamee fi raawwatamaa jiruuf itti gaafatamummaa akka qaban Addi Bilisummaa Oromoo, ABOn ni hubachiisa. Ummatni Oromoo jibbiinsaa fi lola kanneen babal’isan kana of irraa ittisuuf gurmuu isaa akka jabeeffatee qabsoo bilisummaa fi demokraasiif godhu irratti akka fuulleffatu hubachiifna.
Addi Bilisummaa Oromoo, yeroo adda addaa akkuma irra deddeebi’ee waamicha godhaa ture, ajjeechaa, lola babal’isuu fi nagaaf gufuu tahuu deemaa jiru dhaabsisuuf, lammiileen hundi qooda isaanii akka ba’atan ammas irra deebinee waamicha gochaa, rakkoo siyaasaa impaayara Itoophiyaaf marii siyaasaa hunda galeessaaf hundi hojjachuu qaba jenna.
Injifannoo Ummata Bal’aaf!
Adda Bilisummaa Oromoo
Sadaasa 26/2022
Finfinnee, Oromiyaa