Waraanni Bilxiginnaa Obboleessa Qondaala ABO Lammii Beenya kan ta’e Dargaggoo Hundaa’ol Beenyaa Naqamteetti ajjeessan.
(SQ – Waxabajjii 18,2022)
Obboleessa Qondaala ABO kan waggoota lamaaf mana hidhaa keessatti hiraaraa jiruu J/Lammii Beenyaa kan ta’e dargaggoo Hundaa’ol Beenyaa badii tokkaan maleetti Waxabajjii 17,2022 guyyaa kaleessaa magaalaa Naqamteetti hidhattoota mootummaan ajjeesamuu isaa oduun amma ba’e ifa godha.
Poolisootnii fi kaabineen mootummaa Bilxiginnaa ammaaf maqaan adda hin ba’in kaleessa galgala dargaggoo Hundaa’ol Beenyaa rasaasa itti roobsuun erga ajjeesanii booda Hospitaala magaalaa Naqamteetti geessanii gatuu oduun kun ni hubachiisa. Reeffi dargaggoo kanaa hordoffii sab-boontotaan akka argames gabaasameera.
Dargaggoo Hundaa’ol Beenyaa qormaata xumuraaf dhihaachuuf of qopheessaa jiraachuu kan himan maddeen, mucaa ol adeemaa karaatti hambisan jechuun diinummaa sirna kanaa ummatni hadheeffachuu addeessan.
Obboleessa Hundaa’ol Beenyaa kan ta’e Qondaalli ABO Jaal Lammii Beenyaa badii takkaan maleetti, erga waggoota lamaa manneen hidhaa sirna Bilxiginnaa adda addaa keessatti hidhamee kan hiraaraa jiru yoo ta’u, yeroo ammaa mana hidhaa Qajeelcha Poolisii Magaalaa Buraayyuutti argama.
Ariisaa, hidhaa fi gidiraan qaama biyyan bulcha ofiin jedhu sirna Bilxiginnaan maatii Obbo Beenyaa irra geessisame haalaan gaddisiisaa ta’uu kan himan jiraattotni naannoo, kunoo amma ammoo mucaa ol adeemaa dargaggoo Hundaa’ol Beenyaa rasaasa itti roobsanii ajjeesan jechuun hammeenya sirna Bilxiginnaa dubbataniiru.
