Boqochuu Jaal Dirribee Irgaa Ilaalchisee gadda ABO

𝐆𝐮𝐦𝐚𝐚𝐜𝐡𝐢 𝐀𝐚𝐝𝐝𝐞 𝐃𝐢𝐫𝐫𝐢𝐛𝐞𝐞 𝐈𝐫𝐠𝐚𝐚 𝐐𝐚𝐛𝐬𝐨𝐨 𝐁𝐢𝐥𝐢𝐬𝐮𝐦𝐦𝐚𝐚 𝐎𝐫𝐨𝐦𝐨𝐨 𝐤𝐞𝐞𝐬𝐬𝐚𝐭𝐭𝐢 𝐤𝐞𝐧𝐧𝐚𝐧 𝐲𝐨𝐨𝐦𝐮𝐮 𝐣𝐢𝐫𝐚𝐚𝐭𝐚𝐚 𝐟𝐢 𝐤𝐚𝐧 𝐲𝐚𝐚𝐝𝐚𝐭𝐚𝐦𝐮𝐮 𝐝𝐡𝐚.
Ijoo Dubbii ABO – Bitootessa 18,2023
Qabsooftuu jabduu fi murattuu Aadde Dirribee Irgaa du’aan boqotuu isaanii wayta dhageenye gaddi nutti dhaga’ame guddaa dha.
Aadde Dirribeen hanga lubbuun isaanii darbitutti qabsoo bilisummaa Oromoo keessatti murannoo fi gootummaa jabaadhaan qooda isaanii waan isaaniif danda’ame gumaachaa turan. Akkuma dubartootni Oromoo qabsoo bilisummaa Oromoo keessatti hanga wareegama lubbuutti hiriiranii aarsaa olaanaa kafalaa turan, isaanis jabinaa fi cichoominaan dhaabbatanii aarsaa garagaraa baasuudhaan dubartoota Oromoof fakkii ta’anii darbaniiru.
Jireenya isaanii guutuu cunqursaa fi roorroo saba Oromoo irra gahutti xumura gochuuf fuula irra turaniin ifaajjaniiru. Murannoo, cichoominaa fi sab-boonummaa qabanitti diinni aaruudhaan hidhee hidhaa keessatti gidirsus ejjennaa isaanii irraa duuba isaan hin deebisne.
Qabsooftuu sab-boontuu Aadde Dirribee Irgaa ofii isaaniif Mirgaa fi Bilisummaa Oromoof falmuu qofa osoo hin taane, dhala isaaniis qabsoo kanaaf aarsaa godhaniiru. Seenaan qabsoo bilisummaa Oromoos bara baraan isaan yaadata.
Addi Bilisummaa Oromoo du’aan boqotuu Aadde Dirribee Irgaatti gadda itti dhaga’ame irra deebiin ibsaa, maatii fi firoota isaaniif jajjabina hawwa.
Qabsa’aan Ni Kufa, Qabsoon Itti Fufa!
Injifannoo Ummata Bal’aaf!
Adda Bilisummaa Oromoo
Bitootessa 18,2023