Ibsa Gaddaa, Boqotuu Haaji Biiftuu Fayyisoo fi Balaa Konkolaataan Du’uu Barsiisota
Yuniversitii Madda Walaabuu
Adda Bilisummaa Oromoo – Caamsaa 20, 2023
Addi Bilisummaa Oromoo (ABO)n qabsa’aa gameessa, goota namaa, sab-boonaa Oromoo Haaji Biiftuu Fayyisoo guyyaa har’a Caamsaa 20, 2023 du’aan addunyaa kana irraa boqochuu isaanii yeroo dhageenyutti gaddi nutti dhagahame guddaa dha.
Haaji Biiftuu Fayyisoo abbaa isaanii Fayyisoo Dhugee fi haadha isaanii Sinyooree irraa Goodina Arsii, Ona Xiyyoo, Ganda Dankaakaa Qorichaatti bara 1925tti dhalatan. Ijoollummaa isaaniitti akkuma ijoollee baadiyyaa kamii iyyuu jabbiloota tiksaa fi farda gulufsiisaa erga guddatanii booda irras mana barumsaa bara san Raas Dargee jedhamu seenuun hanga kutaa 6ffaatti barnoota ammayyaa baratan.
Haaji Biiftuu Fayyisoo jalqaba bara 1970 keessa qabsaawota bilisummaa Oromoo kanneen akka Kinfee Hindheessaa fi Leellisoo Kaa’oo wajjin ta’uun sochii qabsoo Oromoo Baalee fi Harargee keessatti deemaa ture, sochii qabsoo giddu galeessa keessatti deemaa ture wajjin walquunnamsiisuuf gahee guddaa qaban.
Maanguddoon kun umrii isaanii dargaggummaatti Leellisoo Ka’oo fi Saaddoo Shuqaa wajjin miseensa Waldaa Maccaa fi Tuulamaa ta’anii dirqama hoggantoota waldichaa Koloneel Alamuu Qixxeessaa fi Baqqalaa Nadhiifaatiin itti kennamu guutummaatti hojii irra oolchaa turan.
Haaji Biiftuu Fayyisoo kuufatii mootummaa Dargii booda waan bakka dhaloota isaanii taa’uu dadhabaniif magaalaa guddoo Finfinneetti teessoo jijjiirratanii jaarsa eebbaa ta’uun walgahii Maccaa fi Tuulamaa dabalatee walgahii Oromoo adda addaa irratti argamuun seenaa qabsoo Oromoo fi barbaachisummaa tokkummaa Oromoo irratti dhaamsa ciccimoo dhalootaaf dabarsaa turan.
Bara 1998 hayyoota Oromoo 100 ol Adaamaatti hidhaman keessaa Haaji Biiftuu Fayyisoo tokko turan. Maanguddoon kun bara 2018 kufaatii mootummaa Wayyaanee/EPRDF booda, Asallaatti deebi’uun osoo jiraataa jiranii dhalatanii umrii isaanii waggaa 98tti guyyaa har’aa Caamsaa 20, 2023 du’an boqotan.
Addi Bilisummaa Oromoo (ABO)n, Waaqayyo lubbuu Haaji Biiftuu Fayyisoo jannataan haa qananiisu jechaa, maatii isaanii fi ummata Oromoo maraan jabina isinii haa kennu jedha.
Bifuma wal fakkaatuun guyyaa har’aa Caamsaa 20, 2023 Barsiistota Yunivarsitii Madda Walaabuu magaalaa Roobee Baaleetii ka’uun gara Shaashamannee osoo deemaa jiranii Kibba Baha Oromiyaa, Godina Arsii Lixaa Ona Adaabbaa Ganda Masqal Daarkinaa bakka addaa Qilee Washaa jedhamutti, balaa konkolaataa isaan mudateen konkolaataan ittiin garagalee lubbuun barsiisota 15 battalumatti darbuu yeroo dhageenyu gaddi keenya guddaa dha. Balaa suukanneessaa, onne nama cabsu!
Akka caasaa keenya irraa hubannetti iddoon Qilee Washaa jedhamu kun daandii wal maraa irra keessa qilee jiru, dhiphina daandii irraa kan ka’e yeroo dhaa yerootti gaaga’amni guddaan imaltoota irra gaha. Balaa akkanaa deddeebi’ee mudatu kana daandii dhiphaa sana bal’isuun mootummaan gaaga’ama kana hanqisuu ni danda’a jennee amanna. Haa ta’u malee haala qabatamaa amma mul’ataa jiruun mootummaan maaltu na dhibeen ummata nan bulcha jedhuuf aantummaa fi gaafatamummaa dhabuu isaa agarsiisa.
Qaamni ani mootummaa dha ofiin jedhu akka mootummaatti bu’uuraalee misoomaa keessaa tokko kan tahe, daandii akkas dhiphaa tahe bal’isuu hanqatuun lubbuu namaa akka baalaatti dhaabbatummaan balaa konkolaataan harcaasuu fi kanaafis gaafatamummaa dhabuun yakka.
Addi Bilisummaa Oromoo (ABO)n, Barsiistota balaa konkolaataa suukaneessaa kanaan lubbuu isaanii dhabaniif jennata jechaa, barattoota isaanii, waahillan isaanii, firootaa fi maatii isaaniif obsaa fi jajjabina hawwina.
Injifannoo Ummata Bal’aaf! Adda Bilisummaa
Oromoo Caamsaa 20,2023
Finfinnee
