Lola Oromiyaa Keessaatti Furmaata Waaraa Soquuf, Mootummaan Araara Dhugaaf Balbala Banuu Qaba!
Haala yeroo irratti Ibsa Adda Bilisummaa Oromoo (ABO)
Oromiyaa keessatti waggootaaf lolli geggeeffamaa turee fi jiru gaaga’ama olaanaa ummataa fi biyya keenya irratti fiduun isaa dhugaa hin haalamnee dha. Lola kanaan lubbuu namoota hedduutu bade; Dhiigni lammiilee qulqulluu baay’eetu dhangala’e. Qabeenyi biyyaa fi ummata keenyaa kan silaa jireenya isaa wayyeessuu keessatti gumaachu lola kanaan barbadaa’ee fi qisaasame yoo shallagame haalaan guddaa dha.
Wal hubannaa fi araara dhugaaf of qopheessuu dhabuun, humnaa fi dinagdee jirutti abdatamee murtiin lolatti seename hagam gaaga’ama akka dhaqqabsiise hundaafuu ifaa dha. Lola kanaan bu’aan argame yoo jiraate gidiraa ummata keenyaa hammeessuu, jiruu fi jireenya isaa gaaga’uu fi nageenyi akka dhabamu gochuun ala rakkoo siyaasaa jiruuf furmaata akka hin fidin ABO itti amana.
Lola Oromiyaa keessaa lubbuu lammiilee hedduu galaafate kanatti furmaata barbaaduuf, araarri dhugaa fi haqa qabeessi dhibamuu irraa lolichi bifa jijjiirrataa akka deemu taasisee argama. Kana waan ta’eef, mootummaan paartii Badhaadhinaa (PP), lola Oromiyaa keessaaf furmaata waaraa argamsiisuuf, araara dhugaaf balbala banuu akka qabu ABOn gadi jabeessee gaafata.
Qabsoon bilisummaa Oromoo mirgaa fi bilisummaa Oromoo deebisuuf kan adeemsisamuu dha. Ummatni Oromoos gaaffii mirgaa fi abbaa biyyummaa isaa mirkaneeffachuuf qabsa’a. Ummatni Oromoo fi qabsoon isaa mirga sabootaa guutuutti kan kabajanii dha.
Tumsi Kaabaa imallii fi akeekni isaa Oromiyaa dirree waraanaa taasisuun, dhumaatii kan daranii fi hiraara gara biraa ummata keenyatti fiduu, mirgoota haga ammaa gonfataman sharafuu, Oromiyaa deebisanii dhuunfatuun dinagdee biyyaa saamuu, balaa hin hawwamnee fi hin eegamne dachee keenyaa fi ummata keenyatti fiduuf kan sossohamu ta’uun beekamee, ummatni Oromoo mirga saboota Oromiyaa keessaa kabajaa fi tiksaa, garaagarummaa siyaasaa tokko malee qe’ee fi daangaa isaa jabaatee akka tikfatu ABOn irra deebi’ee dhaama.
Yeroon amma keessa jirru kan cal’isaan wal bira darban waan hin taaneef, Mootummaan Oromiyaa paartiileen Oromoo hundi gaaddisa tokkotti dhufuun dantaa Oromoo bifa hin sharafamneen akka tiksaniif haala mijeessuu akka qabu ABOn yaamicha amma dura taasise irra deebi’ee haaromsa.
Ilaalcha siyaasaa fi deggertummaa dhaabotaa ykn paartileen nama yakkuun hidhuun akkuma lolli furmaata hin argamsiisin kunis furmaata fidu waan hin qabneef, hidhamtootni siyaasaa hundi akka hiikaman irra deebiin mootummaa hubachiisna.
Qaamotni dantaa Oromoof qabsoofna jechaa ulee diinaa ta’uun sirna cunqursaa fi saaminsaa kaleessa ummatni keenya wareegama guddaa itti kafalee of irraa darbate bifa haaraan deebisanii Oromiyaatti harkisan itti gaafatama seenaa jalaa akka hin baane beekuudhaan, deemsa fokkisaa fi qaanfachiisaa akkanaa irraa akka if qusatan ABOn cimsee hubachiisa.
Ammas irra deebi’uudhaan ummatni Oromoo keessaa fi alaa garaagartummaa siyaasaa tokkoon alatti, kan yeroo kamii caalaatti tokkummaa fi gurmuu isaa jabeeffatuu fi itichuun, daangaa biyya isaa eeggachuu akka qabu ABOn yaamicha isaa dhiheessa.
Maayii irratti, lolli dhaabbatee nageenyi akka bu’uuf, ummatni keenya boqonnaa nagaa fi tasgabbiitti akka ce’uuf, dhibdeeleen jiran karaa nagaan furmaata akka argataniif, Araaraa fi Marii hunda galeessaaf, hayyootni, maanguddootnii fi abbootiin amantaa, dippilomaatotnii fi rogeeyyiin miidiyaa dhiibbaa barbaachisu akka taasisan, ummatni keenyas kana ofitti fudhatee milkeessuu irratti akka hojjetu ABOn yaamicha isaa dhiheessa.
Injifannoo Ummata Bal’aaf!
Adda Bilisummaa Oromoo
Fulbaana 24, 2026
Finfinnee
