Gujii lixaa aanaa Dugdaa Daawwaa keessatti hidhattoonni murna bilxiginnaa ilma Oromoo tokko rasaasa itti roobsun ajjeesan.
Amajjii 25, 2023
Ajjeechaan ilmaan Oromoo irratti guyyaa gara guyyaatti adeemsifamaa jiru jabaatee itti fufuun Oromiyaa keessatti nagaan ba’anii galuun rakkoo ta’ee jira.
Namoota nagaa siyaasa keessaa quba hin qabne maqaa garaagaraa itti maxxansuun hidhattoonni garee maafi’aa PP lafa deeman hundatti dhiiga namaa dhangalaasaa lubbuu namootaas akka baalaa harcaasu.
Warroonni ilmaan Oromoo lafa irraa duguuguuf karoorfatanii hojjachaa jiran kun Gujii lixaa aanaa Dudda Daawwaa ganda Meedannoo iddoo addaa Diimaa jedhamu keessatti nama nagaa Gannaalee Worgamaa Girjaa jedhamu guyyaa kaleessaa jechuun Amajjii 24,2023 rasaasa itti roobsuun ajjeesuu jiraattotni dubbatu.
Obbo Gannaaleen abbaa maatii 18 yoo ta’u nama hojii qonnaa hojjachuun ofii fi maatii isaa jiraachisu akkasumas siyaasa kam keessayyuu quba hin qabne akka ta’an jiraattootni kaasuun ilmaan Oromoo badii qabaatanii osoo hin taane Oromummaa qofaan yakkamanii akka ajjeefamaa jiran dabaluun ibsaniiru.
Gama biraan humnootiin tikaa mootummaa Godina Horro Guduruu Wallaggaa Magaalaa Shaambuutti dargaggoo tokko ajjeesuun obboleessa isaa Robina Amsalu Ofola ukkaamsanii hidhuun dhagahame.
Godina Horroo Guduruu Wallaggaa Magaalaa Shaambuutti dargaggoo Robina Amsalu Ofola humnoota tikaa mootummaan ukkaamsame marsaa 3ffaaf hidhame.
Humni tikaa mootummaa obboleessa Robina Amsalu Ofola rasaasaan kan ajjeese yoo tahu Dargaggoo Robina Amsalu Ofola immoo Amajji 1/2023 sirna Awwaalcha obboleessa isaa osoo raawwachaa jiruu humnootiin tikaa mootummaa ukkaamsuun mana hidhaatti darbatanii jiru.
Dargaggoo Robina Amsalu Ofola ammaan duras humnoota tikaa mootummaan sababa miseensa Adda Bilisummaa Oromoo tahe qofaaf irra deddeebiin hidhamaa kan turedha.
Robina Amsalu Ofola sababa miseensa ABO tahe qofaaf humnoota tikaa mootummaan mudde 2015 fi waxabajji 2020 dabalatee yeroo ammaa marsaa 3ffaaf sirna awwaalcha obboleessa isaa irra osoo jiruu Amajji 1/2023 humnoota tikaa mootummaan hidhamee jira.
Dargaggoo Robina Amsalu Ofola miseensa ABO tahee qabsoo karaa nagaa gaggeessuu isaan qofaa humnootiin tikaa mootummaa irra deddeebiin hidhaatti dararaa jiru.
