Du’aan Boqachuu Jaal Jamaal Abbaa Fooggii Ilaalchisee Ijoo Dubbii Adda Biisummaa Oromoo (ABO)
Ijoo Dubbii-Hagayya 30, 2024
Du’aan boqachuu jaal Jamaal Abbaa Foogii yeroo dhageenyutti gadda akkaan ulfaatatuu nutti dhagahame.
Jaal Jamaal Abbaa Foogii miseensa buleessa Adda Bilisumma Oromoo qabsoo Bilisummaa Oromoo ABOn durfamu keessatti wareegama qaamaa qalbii baasuun umrii jireenya isaa guutuu jaala qabsoo Oromootiif jiraataa turee dha. Jaalli kun bu’uureffamuu ABO irraa qabee hanga guyyaa dheengaddaa Addunyaa kana irra du’aan boqatuutti jaala qooda ifaa fi mul’ataa gumaachaa turee dha.
Jaalli kun Oromummaa isaan yakkamuun bara 1980 keessa mootummaa abbaa irree DERGn ganna 10f hidhamee daramaa turus, achii bahee dirqama dhaabni isaa itti kenne fudhachuun ummata Oromoo barsiisaa fi hubannoo qixxaataa kennaafii jaala turee dha. Dhiibbaa fi dhiittaa mootummaa Abbaa irree Wayyaaneenis bara 1993 hojii irraa ar’amee hiraarsaa fi ariisaan diinaa osoo isa hin jilbiiffachiisin jaala ejjannoo xaliilawaa qabaatee Qabsoo Bilisummaa Oromoo fuulduratti furgaasuuf boqonnaa malee jaala hojjataa turee dha.
Jaal Jamaal Abbaa Foogii jireenya isaa guutuu qabsoo Oromoo godhachuun jaala mana ijaaratee osoo maatiis hin horatin, ilmaan Oromoo hundi ilmaan kooti jechaa Bilisummaa Oromoo fi Walabummaa Oromiyaaf hara galfii malee dirqama qabsoo irra jiru qixaan qixatti bahachaa akeekaa fi kaayyoo qabsaawaafii ture irraa osoo hin maqin hagayya 28, 2024 jaalaa du’aan addunyaa kana irraa boqatee dha.
Mooraa QBO qaamaa qalbiin utubuu fi itichuun shira diinaa fashalsee akeekaa fi kaayyoo Oromootti xumura gochuuf jaala osoo qabsaawuu QBO irratti boqate Jaal Jamaal Abbaa Foogii du’aan of biraa dhabuuf irra deebiin gaddi nutti dhagahame akkaan olaanaa dha.
Addi Bilisummaa Oromoo (ABO) n maatii isaaf, firoottan isaaf, wahilan isaaf akkusumaa Qabsaawota Bilisummaa Oromoo fi Uummata Oromoo bal’aaf jajjabina hawwa.
Qabsaawaan Ni Kufa Qabsoon Itti Fufa!
Injifannoo Ummata Bal’aaf!
Adda Bilisummaa Oromoo
Hagayya 30, 2024
Finfinnee
