Godina Harargee bahaa Aanaa Cinaaksanitti hidhattoonni mootummaa naannoo Somaalee weerara lafaatiif bobbaase ummata irratti waraana banuun namoonni nagayaa 6 ajjeefaman.
Weerara hidhattoonni Mootummaa nananoo Somaalee bananiin namoota 6 ajjeefaman malee namoonni 3 madaa’uu jiraattonni dubbatu.
Aanaa Cinaaqsan araddaa Qaaligaa warra Sa’iyyoo Ganda Tamaam jedhamutti wiixata darbe Fulbaana 16 bara 2025 haleellaa hidhattoonni naannoo Somaalee ummata irratti banteen lubbuun namaa darbuu fi qabeenyi saamamuu dhagahame.
Hidhattoonni mootummaa naannoo Somaalee kun hidhannoo ammayyaa hidhachuun halkan dhufanii naannawa gandootaa buluun wayta ganama ummanni hirribaa ka’u dhukaasa irratti banan jedhan.
Hidhattoonni kun ajjeechaa raawwachuun cinatti qabeenya ummataa saamaa jiraachuu himatu jiraattonni nannichaa.
Gandoota Aanichaa daangaa irra jiran irratti waraanni banamuun miidhaan ummata irras gaheera.
Akka jiraattotni jedhanitti hidhattoonni mootummaa naannoo Somaaleetiin bobbaafaman kun guyoota 2 dura daandii guddicha Cinaaqsan fi Jijjigaa wal qubnamsiisu irratti namoota lama konkolaataa keessatti ajjeessan.
Aanaa Cinaaqsan bakka Qocaaraa jedhamutti nama loon isaa tikfatu loon isaa irraa saamuus yaadachuun tahe jedhamee kan raawwatamaa jirudha jedhan.
Aanama Cinaaqsan bakka Waleensoo jedhamutti loon 30, bakka Gololcha jedhamutti ammoo loon 45 saamamuu jiraattonni ni himu.
Rakkoo ummata daangaa irra jiru kana irra gahaa jiruuf mootummaan birmannaa taasisuu qabaatullee hanga ammaatti dirmannaan taasifame hin jiru jedhame.
